ខេត្តបាត់ដំបង÷ករណីគ្រោះថ្នាក់ចរាចរណ៍ដ៏គួរឱ្យរន្ធត់ និងហួសចិត្តមួយបានកើតឡើងនៅតាមបណ្តោយផ្លូវជាតិលេខ៥ ស្ថិតក្នុងសង្កាត់រតនៈ ក្រុងបាត់ដំបង ខេត្តបាត់ដំបង ដែលបង្កឡើងដោយរថយន្តដឹកជញ្ជូនរបស់ក្រុមហ៊ុន វីរៈប៊ុនថាំ បានបើកទាក់ខ្សែកាប បណ្តាលឱ្យធ្លាក់មកទាក់កប្រជាពលរដ្ឋស្លូតត្រង់ម្នាក់ដែលកំពុងធ្វើដំណើរលើដងផ្លូវ ធ្វើឱ្យរងរបួសយ៉ាងដំណំ។
ប្រភពបានបន្តថា// ទោះបីជាយ៉ាងណាក៏ដោយ អាកប្បកិរិយារបស់ភាគីបង្កហាក់បីដូចជាគ្មានសីលធម៌អាជីវកម្មសោះឡើយ។ ក្រោយពេលកើតហេតុ ជនរងគ្រោះបានដាក់ពាក្យបណ្តឹងនៅស្នងការដ្ឋាននគរបាលខេត្តបាត់ដំបង ដើម្បីស្វែងរកយុត្តិធម៌។ ប៉ុន្តែ អ្វីដែលទទួលបានគឺការខកចិត្តយ៉ាងខ្លាំង នៅពេលដែលក្រុមហ៊ុន វីរៈប៊ុនថាំ មិនបានបញ្ជូនតំណាងដែលមានសិទ្ធិសម្រេច ឬម្ចាស់ក្រុមហ៊ុនមកដោះស្រាយដោយផ្ទាល់ បែរជាបញ្ជូនភ្នាក់ងារធានារ៉ាប់រងមកជំនួសមុខ។ លើសពីនេះ យុទ្ធសាស្ត្រដែលពួកគេប្រើប្រាស់គឺការ «បង្វែរដាន» ដោយក្រុមហ៊ុនធានារ៉ាប់រងនោះ បានជំរុញឱ្យជនរងគ្រោះទៅប្តឹងក្រុមហ៊ុនខ្សែកាប ដោយសំអាងហេតុផលដោះសារ ដើម្បីគេចវេះពីសំណង។
គួររំលឹកផងដែរថា// គឺថាអនុសាសន៍ នៃករណីនេះមិនគួរត្រូវបានបញ្ចប់ត្រឹមការសម្របសម្រួលស្ងាត់ៗ ឬការអូសបន្លាយពេលនោះទេ។ អាជ្ញាធរមានសមត្ថកិច្ច ជាពិសេសស្នងការដ្ឋាននគរបាលខេត្តបាត់ដំបង និងសាលាក្រុង ត្រូវតែចាត់វិធានការឱ្យម៉ឺងម៉ាត់បំផុត។
១. ត្រូវតែមានការទទួលខុសត្រូវ៖ ម្ចាស់ក្រុមហ៊ុន ឬអ្នកទទួលខុសត្រូវជាន់ខ្ពស់របស់ វីរៈប៊ុនថាំ ត្រូវតែចេញមុខមកដោះស្រាយដោយផ្ទាល់ មិនមែនពឹងលើក្រុមហ៊ុនធានារ៉ាប់រងដែលព្យាយាមតែគេចវេះនោះទេ។
២. ការផាកពិន័យ និងដាក់ទណ្ឌកម្ម៖ ប្រសិនបើរកឃើញថាមានការបំពានលើសារាចរណ៍ណែនាំរបស់សាលាក្រុងមែន ត្រូវតែមានការផាកពិន័យធ្ងន់ធ្ងរ ឬផ្អាកអាជ្ញាបណ្ណធ្វើអាជីវកម្មក្នុងតំបន់នោះជាបណ្តោះអាសន្ន ដើម្បីជាការព្រមាន។
៣. យុត្តិធម៌សម្រាប់ជនរងគ្រោះ៖ សំណងដែលសមរម្យសម្រាប់ការព្យាបាល និងការខាតបង់ពេលវេលា ព្រមទាំងការសងជំងឺចិត្ត ត្រូវតែផ្តល់ជូនជនរងគ្រោះជាបន្ទាន់ ដោយមិនចាំបាច់មានការលេងល្បែងបោះបាល់ដាក់គ្នា។ នេះគឺជាមេរៀនមួយដែលបង្ហាញថា ក្រុមហ៊ុនឯកជន ទោះបីធំប៉ុណ្ណាក៏ដោយ មិនគួរនៅពីលើច្បាប់ ឬយកជីវិត និងសុវត្ថិភាពរបស់ប្រជាពលរដ្ឋធ្វើជាសំណើចនោះឡើយ។
អង្គភាពអ្នកសារព័ត៌មានយើងគ្រាន់តែជាកញ្ចក់ឆ្លុះបញ្ចាំងរិះគន់ក្នុងន័យស្ថាបនានិងសូមរង់ចាំការឆ្លើយបំភ្លឺគ្រប់ស្ថាប័នពាក់ព័ន្ធគ្រប់ពេលម៉ោងធ្វើការតាមរបបអ្នកសារព័ត៌មានសូមអរគុណ៕
