វាជាមោទនភាពខ្លាំងបំផុតដែលកម្ពុជាធ្លាប់ជាប្រទេសដែលញាំញីដោយសង្គ្រាម និងធ្លាប់ជាប្រទេសដែលទទួលកងកម្លាំងរក្សាសន្តិភាពអង្គការសហប្រជាជាតិនៅលើទឹកដីរបស់ខ្លួន តែបានក្លាយជាប្រទេសដែលបញ្ជូនកងកម្លាំងទៅរក្សាសន្តិភាពក្រោមឆត្រអង្គការសហប្រជាជាតិ ដែលបានចាប់ផ្តើមជាផ្លូវការកាលពីឆ្នាំ២០០៦ ដោយរហូតដល់បច្ចុប្បន្នកម្ពុជាបានបញ្ជូនកងកម្លាំងរក្សាសន្តិភាពសរុបជិត ១ម៉ឺននាក់ទាំងបុរស ទាំងនារី ទៅកាន់បេសកកម្មចំនួន ១២ ក្នុងប្រទេសចំនួន ១០ រួមមាន ស៊ូដង់ ស៊ូដង់ខាងត្បូង លីបង់ ម៉ាលី អាហ្វ្រិកកណ្តាល ស៊ីរី សាយប្រឺស ឆាត យេម៉ែន និងកុងហ្គោ ដោយកងកម្លាំង កម្ពុជាបានបំពេញបេសកកម្មលើជំនាញសំខាន់ៗដូចជា បោសសម្អាតមីន និងយុទ្ធភណ្ឌមិនទាន់ផ្ទុះ វិស្វកម្មសំណង់ អាវុធហត្ថ មន្ទីរពេទ្យកម្រិត២ និងនាយទាហានសង្កេតការណ៍ជាដើម។
ចំពោះការបំពេញបេសកកម្មមនុស្សក្រោមឆត្រអង្គការសហប្រជាជាតិនេះដែរ កងកម្លាំងមួកខៀវកម្ពុជា តែងទទួលបានការកោតសរសើរ និងវាយតម្លៃខ្ពស់ពីខាងភាគីអង្គការសហប្រជាជាតិ និងពីបណ្តាប្រទេសមួយចំនួនដែលបានបញ្ជូនកងកម្លាំងចូលរួមក្នុងបេសកកម្មនេះ។ វាបានក្លាយទៅជាកម្លាំងចិត្តមួយដ៏សំខាន់បន្ថែមទៀតសម្រាប់កងកម្លាំងកម្ពុជាក្នុងការបំពេញបេសកកម្មមនុស្សធម៌ តាមរយៈការធ្វើកិច្ចការមួយចំនួន ដែលភាគីអង្គការសហប្រជាជាតិបានប្រគល់ជូន រួមមាន បោសសម្អាតមីន និងយុទ្ធភណ្ឌមិនទាន់ផ្ទុះ វិស្វកម្មសំណង់ អាវុធហត្ថ មន្ទីរពេទ្យកម្រិត២ និងនាយទាហានសង្កេតការណ៍ជាដើម ដើម្បីផ្តល់សុខសុវត្ថិភាពជូនពលរដ្ឋនៅតាមបណ្តាប្រទេស ដែលកងកម្លាំងកំពុងបំពេញបេសកកម្ម មានដូចជា ស៊ូដង់ ស៊ូដង់ខាងត្បូង លីបង់ ម៉ាលី អាហ្វ្រិកកណ្តាល ស៊ីរី សាយប្រឺស ឆាត យេម៉ែន និងកុងហ្គោជាដើម៕ ដោយ៖ ចាន់ សុភឿន
