ខណ្ឌមានជ័យ÷ នៅថ្ងៃព្រហស្បតិ៍ ១១រោច ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១១ ខែមិថុនា ឆ្នាំ២០២៦ ក្រោមការចង្អុលបង្ហាញពី ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ។
ដោយមានការសម្របសម្រួលពី លោក លី គឹមស៊ាន ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះត្រួតពិនិត្យឃ្លាំងស្តុកសាច់បង្កក ដេីម្បីចែកចាយបន្ត មានចំនួន០២ទីតាំងក្នុងមូលដ្ឋានខណ្ឌមានជ័យរួមមាន÷
១/ ទីតាំងសាច់បង្កកទី១ ឃ្លាំងដាក់សាច់បង្កក នាំចូលពីប្រទេសចិន ស្ថិតនៅភូមិឬស្សី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
២/ ទីតាំងសាច់បង្កកទី២ ស្ថិតនៅផ្ទះលេខ៣១៥ ផ្លូវ៤៥mc ភូមិឫស្សី២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។
ជាលទ្ធផល៖
-ជើងមាន់ (Seara ប្រេស៊ីល) ចំនួន ១៣០កេស
-កោះមាន់ មានឡូហ្គូថៃ ០១ថង់
-កោះមាន់ មានកាត់មាកផលិតផលទម្រង់ដូចគ្នា GIZZABD ចំនួន ២៦៧កេស
-ទាមូល (GB ចិន) ចំនួន ២៣កេស
-គូទមាន់ (Seara ប្រេស៊ីល) ចំនួន ២៤កេស
-ក្បាលពោះវៀនធំជ្រូក (ប្រេស៊ីល) ចំនូន ៧កេស
-ភ្លៅមាន់ (EE.UU) ចំនួន ៥កេស
-ទ្រូងមាន់ (ចិន) ចំនួន ៦៥កេស
-ជើងទា (ប្រេស៊ីល) ចំនួន ១កេស
-ចុងស្លាបមាន់ (ប្រេស៊ីល) ចំនួន ១០០កេស។
ក្នុងនោះអាជ្ញាធរសម្រេចនាំខ្លួនម្ចាស់ទីតាំងទី២ ឈ្មោះ ស៊ុន បុត្រី ភេទប្រុស ១នាក់ ទៅស្នងការដ្ឋាននគរបាលរាជធានីភ្នំពេញ ដេីម្បីសាកសួរ និងបានបិទឃ្លុំ (បិទសៀល) ឃ្លាំងជាមួយទំនិញដូចរៀបរាប់ខាងលេីដែលជនសង្ស័យ នាំចូលជាសាច់បង្កកខុសច្បាប់មកពីប្រទេសថៃ ។
 |
ប្រតិបត្តិការដ៏ក្តៅកគុកនេះ ធ្វើឡើងបន្ទាប់ពីសម្ដេច តេជោហ៊ុនសែន ប្រធានរដ្ឋសភាកម្ពុជា បានលើកឡើង នៅក្នុងពិធីសំណេះសំណាល ជាមួយបងប្អូនជនភៀសសឹក នៅខេត្តឧត្តមានជ័យ សម្តេចតេជោប្រកាសច្បាស់ៗ ថាមិនត្រូវការទំនិញថៃចូលមកប្រទេសកម្ពុជានោះទេ។
«ឈប់ជាបន្ទាន់ ដកខ្លួនជាបន្ទាន់ ហើយរកមុខរបរផ្សេង!» សម្តេចតេជោ ហ៊ុន សែន បន្តថ្លែងពីខេត្តបាត់ដំបង នៅរសៀលថ្ងៃទី១១ មិថុនានេះ បញ្ជាឱ្យ អភិបាលរាជធានីភ្នំពេញ អគ្គស្នងការនគរបាលជាតិ បើកការស៊ើបអង្កេតទាំងអស់ មិនឱ្យទំនិញថៃណាចូលស្រុកខ្មែរនោះទេ។
សម្តេចតេជោ ថ្លែងថា៖«ប្រមូលឱ្យអស់ទាំងអ្នកបើកឡាន..ហើយថៅកែៗ ទុកថៅកែខ្លះឱ្យខ្ញុំសួរចម្លើយផ្ទាល់...ជួបម្នាក់ម្តងៗសួរ និយាយឱ្យត្រង់មកឱ្យលុយអាណាខ្លះ»៕
