ក្នុងនាមយើងខ្ញុំ ជាអ្នកអ្នកសារព័ត៌មានអាជីព ដឹកនាំអង្គភាពសារព័ត៌មាន ប្រកបដោយវិជ្ជាជីវៈ វ័យក្មេងមួយរូប ដែលតែងតែ គិតគូរពីប្រយោជន៍សង្គម និងសន្តិភាពជាធំ ខ្ញុំបាទមិនអាចទទួលយកការ វាយតម្លៃបែបអវិជ្ជមានទាំងដែលមិនទទួលបានព័ត៌មានគ្រប់ជ្រុងជ្រោយ (ស្មើនឹងមនុស្សល្ងង់ខ្លៅ) បែបនេះបានឡើយ ហើយសូមធ្វើការឆ្លើយតបបំភ្លឺ ដោយឈរលើហេតុផល និងវិជ្ជាជីវៈដូចខាងក្រោម៖
 |
១. សារព័ត៌មានជាកញ្ចក់ឆ្លុះតថភាពសង្គម មិនមែនជាការបំផ្លិចបំផ្លាញ៖ បេសកកម្មចម្បងរបស់ អ្នកសារព័ត៌មាន គឺការចុះយកព័ត៌មាន និងរាយការណ៍ពីតថភាពជាក់ស្តែង ដើម្បីជាប្រយោជន៍សាធារណៈ និងជាជំនួយដល់ថ្នាក់ដឹកនាំ។
ការថតរូប ឬការផ្សព្វផ្សាយនៅទីតាំងនានា គឺធ្វើឡើងក្នុងគោលបំណង ធានានូវតម្លាភាព មិនមែនក្នុងចេតនាទុច្ចរិត ឬរំខានដល់ការអភិវឌ្ឍនោះឡើយ។
២. មិនអាចយកកំហុសបុគ្គលមកវាយតម្លៃវិជ្ជាជីវៈរួម ;ខ្ញុំបាទទទួលស្គាល់ថា ក្នុងចំណោមអ្នកសារព័ត៌មាន អាចមានបុគ្គលមួយចំនួនតូចដែលនៅមានកម្រិត ឬខ្វះចន្លោះបច្ចេកទេសក្នុងការធ្វើព័ត៌មាន ប៉ុន្តែ ការប្រើប្រាស់ពាក្យវាយតម្លៃជារួមមកលើ «ពួកកាសែត» ទាំងមូលថា «ខូច» គឺពិតជាបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស ទឹកចិត្ត និងសេចក្តីថ្លៃថ្នូររបស់អ្នកសារព័ត៌មានអាជីពរាប់ពាន់នាក់ ដែលកំពុងខិតខំបំពេញភារកិច្ចដោយស្មោះត្រង់ សុចរិត និងគោរពច្បាប់ជាតិ។
៣. តម្លាភាព និងកិច្ចសហការ គឺជាគន្លឹះដោះស្រាយបញ្ហា៖ ដើម្បីជៀសវាងការយល់ច្រឡំ គ្រប់ស្ថាប័នរដ្ឋ ឬគម្រោងអភិវឌ្ឍន៍ទាំងអស់ គួរតែបើកចំហ និងបិទបង្ហាញពីភាពស្របច្បាប់នៃគម្រោងនានាជាសាធារណៈដើម្បីឲ្យមហាជនបានដឹង។
កាលណាមានការផ្តល់ព័ត៌មានច្បាស់លាស់ នោះការផ្សព្វផ្សាយខុសឆ្គងក៏មិនអាចកើតមានឡើងដែរ ផ្ទុយទៅវិញ កន្លងមកមានករណីជនខិលខូចមួយចំនួនបានរំលោភយកដីទន្លេ និងដីចំណីផ្លូវទាំងគ្មានច្បាប់អនុញ្ញាត ក៏ដោយសារបានកញ្ចក់ឆ្លុះពីសារព័ត៌មាននេះដែរ ទើបមានចំណាត់ការរុះរើជាបន្តបន្ទាប់។
ក្នុងនាមខ្ញុំ ចាងហ្វាងការផ្សាយ និងជាទីប្រឹក្សា សមាគមសម្ព័ន្ធយុវជនសារព័ត៌មានដើម្បីសន្តិភាព សូមអំពាវនាវដល់ថ្នាក់ដឹកនាំគ្រប់លំដាប់ថ្នាក់ ជាពិសេស ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម មេត្តាពិនិត្យករណីនេះឡើងវិញ និងបន្តផ្តល់តម្លៃ យោគយល់ ព្រមទាំងគាំទ្រដល់អ្នកសារព័ត៌មាន។
យើងខ្ញុំរង់ចាំជានិច្ចក្នុងការធ្វើការរួមគ្នាជាមួយគ្រប់ស្ថាប័នរដ្ឋ ដោយឈរលើវប្បធម៌សន្ទនា គោរពគ្នាទៅវិញទៅមក ដើម្បីរួមគ្នាថែរក្សាសុខសន្តិភាព និងការអភិវឌ្ឍសង្គមជាតិ។
គូររំលឹកផងដែរ យោងតាមអនុសាសន៍សម្ដេចតេជោហ៊ុន សែន កាល លោកនៅជានាយករដ្ឋមន្ត្រីលោកបានបញ្ជាក់យ៉ាងច្បាស់ថា អ្នកសារព័ត៌មានជាដៃគូដ៏សំខាន់សម្រាប់ការអភិវឌ្ឍប្រទេសជាតិដែលមិនអាចខ្វះបាន សម្រាប់មន្ត្រីដែលមិនចូលចិត្តអ្នកស្ដាប់ព័ត៌មាន យកអ្នកសារព័ត៌មានជាសត្រូវ គឺជាមន្ត្រីគ្រាប់ល្ពៅ មន្ត្រីគ្រាប់ធុរេន ។
អង្គភាពសារព័ត៌មានស្នើសុំដល់ សម្ដេច តេជោហ៊ុនសែន ប្រធានរដ្ឋសភានៃព្រះរាជាណាចក្រកម្ពុជា សម្ដេចបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សូមលោកទងពីរ មេត្តាជួយត្រួតពិនិត្យ លើក្រមសីលធម៌វិជ្ជាជីវៈ លើអភិបាលខេត្តកំពង់ចាម រូបនេះដោយក្តីអនុគ្រោះផងចុះ ៕
