ភ្នំពេញ÷ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី បានអញ្ជើញចូលរួមកិច្ចប្រជុំប្រចាំឆ្នាំលើកទី១៨ របស់ក្រុមប្រឹក្សាមជ្ឈមណ្ឌលអាស៊ាន-កូរ៉េ (AKC) នៅសណ្ឋាគារ Westin Josun ក្នុងទីក្រុងសេអ៊ូល ដោយមានការចូលរួមពីសំណាក់មន្ត្រីការទូតអញ្ជើញមកពីក្រសួងការបរទេស និងសហប្រតិបត្តិការអន្តរជាតិកម្ពុជា ព្រមទាំងមន្រ្តីរដ្ឋាភិបាលជាន់ខ្ពស់ និងមន្ត្រីការទូតមកពីបណ្តាប្រទេសជាសមាជិកនៃមជ្ឈមណ្ឌលអាស៊ាន-កូរ៉េ។
កិច្ចប្រជុំ ដែលបានធ្វើឡើងថ្ងៃទី ១១ ខែកុម្ភៈ ឆ្នាំ២០២៦ថ្មីៗនេះ បានផ្តោតលើការពិនិត្យឡើងវិញនូវលទ្ធផលរបស់មជ្ឈមណ្ឌលអាស៊ាន-កូរ៉េ ដែលបានអនុវត្តនៅក្នុងកំឡុងឆ្នាំ២០២៥ និងការគាំទ្រផែនការកម្មវិធីសកម្មភាពការងារសម្រាប់ឆ្នាំ ២០២៦។
កិច្ចប្រជុំក៏បានពិភាក្សាដោយផ្តោតលើតួនាទីរបស់មជ្ឍមណ្ឌលអាស៊ាន-កូរ៉េ និងទិសដៅនៃគំនិតផ្តួចផ្តើមសំខាន់ៗរបស់មជ្ឍមណ្ឌល ក្នុងការគាំទ្រដល់ការអនុវត្តភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-កូរ៉េ Comprehensive Strategic Partnership (CSP) និងផែនការសកម្មភាពរបស់អាស៊ាន-កូរ៉េ (២០២៦-២០៣០) ផងដែរ។ ជាមួយគ្នានេះផងដែរ លោកជំទាវ Chung Eui-hae អនុរដ្ឋមន្ត្រីក្រសួងការបរទេសនៃសាធារណរដ្ឋកូរ៉េ បានថ្លែងសុន្ទរកថាស្វាគមន៍ នៅក្នុងពិធីលាងសាយភោជន៍ទទួលស្វាគមន៍គណៈប្រតិភូ និងអង្គពិធីផងដែរ។
ពិធីលាងសាយភោជន៍ទទួលស្វាគមន៍នេះក៏បានផ្តល់ឱកាសដល់គណៈប្រតិភូ អង្គពិធី និងវិស័យឯកជនបានផ្លាស់ប្តូរមតិយោបល់គ្នាក្នុងគោលបំណងលើកកម្ពស់កិច្ចសហប្រតិបត្តិការអាស៊ាន-កូរ៉េផងដែរ៕ ដោយ៖ កន ចំណាន
