ភ្នំពេញ÷មហាជន និងអ្នកប្រើប្រាស់បណ្ដាញសង្គមជាច្រើនកំពុងផ្ទុះការចាប់អារម្មណ៍ និងជជែកវែកញែកយ៉ាងផុសផុលជុំវិញពាក្យ «កូនខ្លា» និង «មេ.ស07» ដែលត្រូវបានចែកចាយយ៉ាងទូលំទូលាយនៅលើបណ្ដាញសង្គមក្នុងរយៈពេលប៉ុន្មានថ្ងៃចុងក្រោយនេះ។
ភ្លាមៗក្រោយពីផ្ទុះការចែករំលែក និងការរិះគន់យ៉ាងខ្លាំង ឯកឧត្តម ឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានដាក់បទបញ្ជាឱ្យកម្លាំងសមត្ថកិច្ចជំនាញបើកការស្រាវជ្រាវជាបន្ទាន់ ដើម្បីស្វែងរក និងកំណត់អត្តសញ្ញាណបុគ្គលដែលពាក់ព័ន្ធ។
សមត្ថកិច្ចបានបញ្ជាក់ថា ប្រសិនបើរកឃើញថាមានការប្រព្រឹត្តបទល្មើស ឬសកម្មភាពណាមួយដែលផ្ទុយនឹងច្បាប់ នោះនឹងត្រូវនាំខ្លួនមកកសាងសំណុំរឿង និងបញ្ជូនទៅកាន់តុលាការចាត់ការតាមនីតិវិធី ដោយមិនមានការលើកលែងជាដាច់ខាត។
ជាមួយគ្នានេះ អាជ្ញាធរក៏បានអំពាវនាវដល់ប្រជាពលរដ្ឋទាំងអស់ ប្រសិនបើមានព័ត៌មាន ឬបានប្រទះឃើញបុគ្គលដែលគេហៅថា «កូនខ្លា» និងបក្សពួក សូមរាយការណ៍ជូនសមត្ថកិច្ចដែលនៅជិតបំផុត ដើម្បីចូលរួមសហការក្នុងការអនុវត្តច្បាប់ និងថែរក្សាសន្តិសុខសណ្ដាប់ធ្នាប់សង្គម។
គួរបញ្ជាក់ថា មកដល់ពេលនេះ សមត្ថកិច្ចមិនទាន់បានបញ្ចេញព័ត៌មានផ្លូវការអំពីអត្តសញ្ញាណរបស់ «កូនខ្លា» និង «មេស 07» នៅឡើយទេ ហើយការស្រាវជ្រាវកំពុងបន្តយ៉ាងយកចិត្តទុកដាក់៕អត្ថបទដោយខ្លាពីរ
