រាជធានីភ្នំពេញ៖ នារសៀលថ្ងៃទី០២ ខែកញ្ញា ឆ្នាំ២០២៦នេះ តំណាងអាជីវករជាង២០នាក់ ដែលធ្វើដំណើរមកពីបណ្តារាជធានី-ខេត្តផ្សេងៗគ្នា បានស្វែងរកកិច្ចអន្តរាគមន៍ពីក្រុមអ្នកសារព័ត៌មាន ដើម្បីជួយបំពងសំឡេង និងជួយស្នើសុំទៅកាន់ក្រុមហ៊ុនភេសជ្ជៈ «ខារ៉ាបាវ» (Carabao) និង «អ៉ីឈីតាន់» (Ichitan) ឱ្យទទួលប្តូរក្រវិលកំប៉ុង ដែលកំពុងកកស្ទះនៅក្នុងដៃអាជីវករម្នាក់ៗយ៉ាងច្រើនសន្ធឹកសន្ធាប់។
ទោះជាយ៉ាងណាក៏ដោយ ក្នុងស្មារតីទទួលខុសត្រូវចំពោះអតិថិជន និងដើម្បីរក្សាម៉ូយ ពួកគាត់នៅតែបន្តទទួលប្តូរក្រវិលកំប៉ុងត្រូវរង្វាន់ពីអតិថិជនជាហូរហែ ដែលកត្តានេះបានធ្វើឱ្យក្រវិលកំប៉ុងកកស្ទះនៅក្នុងដៃអាជីវករម្នាក់ៗរហូតដល់ទៅជាង ៣០០កេស ឬច្រើនជាងនេះ ដោយមិនអាចយកទៅប្តូរយកប្រាក់ ឬទំនិញថ្មីត្រឡប់មកវិញពីក្រុមហ៊ុនបានឡើយ។
ផ្អែកលើការប្រឈមមុខនឹងវិបត្តិហិរញ្ញវត្ថុយ៉ាងធ្ងន់ធ្ងរនេះ ក្រុមអាជីវករបានបញ្ជាក់ថា ពួកគាត់បានរៀបចំ និងដាក់ញត្តិស្នើសុំកិច្ចអន្តរាគមន៍ផ្លូវការទៅកាន់ក្រសួងស្ថាប័នពាក់ព័ន្ធចំនួនបី រួមមានក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។
ពាក់ព័ន្ធនឹងករណីខាងលើនេះ អង្គភាពអ្នកសារព័ត៌មានយើង នៅមិនទាន់អាចសុំការបកស្រាយ ឬបញ្ជាក់បន្ថែមពីតំណាងក្រុមហ៊ុនភេសជ្ជៈ ខារ៉ាបាវ និងអ៉ីឈីតាន់ បាននៅឡើយទេនារសៀលថ្ងៃដដែលនេះ។
អង្គភាពយើងខ្ញុំរង់ចាំទទួលការឆ្លើយបំភ្លឺពីគ្រប់ភាគីពាក់ព័ន្ធជានិច្ច ដើម្បីធានាបាននូវតម្លាភាព និងភាពត្រឹមត្រូវ ស្របតាមក្រមសីលធម៌វិជ្ជាជីវៈសារព័ត៌មាន ៕
