ភ្នំពេញ÷ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានលើកទឹកចិត្ត ជំរុញអោយក្រុមការងាររៀបចំសេវាអនឡាញ បន្តសហការជាមួយដៃគូ ពិនិត្យលទ្ធភាព បង្កើនមុខងារ និងភាពចាំបាច់របស់សេវាសាធារណៈ អនឡាញរបស់ខ្លួន ។
នៅក្នុងកិច្ចប្រជុំពិភាក្សាលើការផ្តល់សេវាសាធារណៈអនឡាញ របស់ក្រសួងរៀបចំដែនដី កាលពីថ្ងៃ១៥ កញ្ញា ២០២៦ បានលើកអំពីចងក្រងព័ត៌មានលម្អិតចាំបាច់ទាំងអស់នៅលើ Portal រួមមួយ ដែលអាចឆ្លើយតបបានគ្រប់លក្ខខណ្ឌតម្រូវ របស់ភាគីពាក់ព័ន្ធ ប្រកបដោយតម្លាភាព ប្រសិទ្ធភាព និងសុវត្ថិភាព។ សូមបញ្ជាក់ថា ការផ្តល់សេវាអនឡាញ ផ្តល់នូវអត្ថប្រយោជន៍សំខាន់ៗជាច្រើនដូចជា ភាពងាយស្រួល តម្លាភាព បំបាត់ថ្លៃសេវាក្រៅផ្លូវការ សន្សំសំចៃពេលវេលានិងថ្លៃធ្វើដំណើរ។
បច្ចុប្បន្ននេះប្រជាពលរដ្ឋអាចស្នើសុំ និងប្រើប្រាស់សេវាសាធារណៈអនឡាញ របស់ក្រសួងរៀបចំដែនដី នគរូបនីយកម្ម និងសំណង់លើវិស័យសំខាន់ៗដូចជា សុរិយោដី និងសំណង់ តាមរយៈគេហទំព័រផ្លូវការរបស់ក្រសួង ដោយមានសេវាគោលៗដូចខាងក្រោម៖
១. សេវាសុរិយោដីតាមប្រព័ន្ធអឡិកត្រូនិក ការលក់ និងអំណោយផ្តាច់ ដូចជាសេវាផ្ទេរកម្មសិទ្ធិដីធ្លីតាមអនឡាញទូទាំងប្រទេស។ សេវាហ៊ីប៉ូតែក និងបញ្ចាំ រួមមានការដាក់បញ្ចាំ ឬដាក់ហ៊ីប៉ូតែកអចលនវត្ថុតាមប្រព័ន្ធឌីជីថល ការស្វែងរកព័ត៌មានក្បាលដី ដែលរួមមានពិនិត្យ និងឆែកព័ត៌មានក្បាលដីដោយបញ្ចូលលេខវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង)។ សេវាចុះបញ្ជី និងដោះស្រាយលើសំណើសុរិយោដីផ្សេងៗ ដែលត្រូវបានពង្រីកសាកល្បង និងដាក់ឱ្យប្រើប្រាស់ជាបន្តបន្ទាប់ ។
២. សេវាសំណង់តាមប្រព័ន្ធអេឡិចត្រូនិក ដូចជា ការស្នើសុំលិខិតអនុញ្ញាតសាងសង់ ។ការរុះរើ ឬជួសជុលដែលដាក់ពាក្យស្នើសុំ និងតាមដានដំណើរការសំណង់តាមអនឡាញ។ សេវាពិនិត្យ និងតាមដានសំណង់ ដូចជាការស្នើសុំសេវាបច្ចេកទេស និងត្រួតពិនិត្យផ្សេងៗពាក់ព័ន្ធនឹងវិស័យសំណង់៕ អត្ថបទ៖ ពេជ ប៊ុនរ៉ា អេបក្រសួងព័ត៌មាន (MoINFO APP)
