សៀមរាប÷ក្រសួងទេសចរណ៍បានបញ្ជាក់ជូនសាជាថ្មីពីការលើកលែងទិដ្ឋាការជាបណ្តោះអាសន្នសម្រាប់ប្រជាពលរដ្ឋចិន ចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលា ឆ្នាំ២០២៦ខាងមុខនេះ ដើម្បីសម្រួលការធ្វើដំណើរ និងទាក់ទាញភ្ញៀវទេសចរចិនមកកម្ពុជាកាន់តែច្រើន ជាពិសេសក្នុងយុទ្ធនាការ «ទស្សនាកម្ពុជានារដូវបៃតង»។
សូមរម្លឹកថា យុទ្ធនាការ «ទស្សនាកម្ពុជានារដូវបៃតងឆ្នាំ២០២៦» គឺជាគំនិតផ្ដួចផ្ដើមរបស់ ក្រសួងទេសចរណ៍ ដើម្បីទាក់ទាញភ្ញៀវទេសចរមកលេងកម្សាន្តក្នុងអំឡុងរដូវវស្សា ចាប់ពីខែឧសភា ដល់ខែតុលា ឆ្នាំ២០២៦ដែលមានគោលបំណង បង្កើនការលើកទឹកចិត្តឱ្យភ្ញៀវទេសចរជាតិ និងអន្តរជាតិដើរលេងកំសាន្តនាអំឡុងរដូវវស្សាតាមរយៈគោលដៅធម្មជាតិ តំបន់ឆ្នេរ វប្បធម៌ និងសាសនា ដែលមានកត្តាសំខាន់ៗចំនួន ៦ គួរគឺ គួរចង់ឃើញ គួរស្នាក់នៅ គួរភ្លក្ស គួរទិញ គួរលេង និងគួររីករាយ ក្នុងកិច្ចប្រឹងប្រែងប្រែក្លាយរដូវវស្សាឱ្យទៅជារដូវកាលទេសចរណ៍ដ៏សកម្មមួយ។
យោងតាមក្រសួងទេសចរណ៍បានឲ្យដឹងថាពេញមួយឆ្នាំ២០២៥កន្លងនេះ ប្រទេសកម្ពុជាទទួលបានភ្ញៀវទេសចរអន្តរជាតិជនជាតិចិនប្រមាណ ជាង ១,២ លាននាក់ ដែលកើនឡើងប្រមាណ ៤២ភាគរយ បើធៀបនឹងឆ្នាំ២០២៤ដោយ ទេសចរចិនស្ថិតនៅក្នុងលំដាប់ថ្នាក់លេខ២។ ចំណែកឯក្នុងអំឡុងរយៈពេល ៥ ខែដំបូង ឆ្នាំ ២០២៦ កម្ពុជាទទួលបានភ្ញៀវទេសចរចិនប្រមាណ ៤០ម៉ឺននាក់ ឈរនៅលំដាប់ទី១ ក្នុងចំណោមភ្ញៀវទេសចរអន្តរជាតិសរុប។ ជាវិធានការជំរុញបន្ថែម ក្រសួងទេសចរណ៍ បានដាក់ចេញនូវគោលនយោបាយ លើកលែងទិដ្ឋាការសាកល្បង សម្រាប់ភ្ញៀវទេសចរចិន ដើម្បីទាក់ទាញអ្នកដំណើរ និងលើកស្ទួយវិស័យទេសចរណ៍ក្នុងរដូវកាលបៃតងនេះ៕ អត្ថបទ៖ ពេជ ប៊ុនរ៉ា អេបក្រសួងព័ត៌មាន(MoINFO APP)
